கண்ணில் கண்டவர்களை எல்லாம் கத்தியால் குத்திய கொடூரன்: பாசிலோனாவே அதிர்ந்தது !

ஸ்பெயினின் பார்சிலோனா நகரில் நேற்று காலை பொதுமக்கள் முன்னிலையில் இளம்பெண் ஒருவர் கத்தியால் குத்தி படுகொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. பார்சிலோனாவின் எஸ்ப்ளக்ஸ் டி லோப்ரெகாட் (Esplugues de Llobregat) பகுதியில் காலை 11 மணியளவில் இந்த கோரச் சம்பவம் நிகழ்ந்தது. மக்கள் நடமாட்டம் மிகுந்த தெருவில், எவ்வித காரணமுமின்றி அந்தப் பெண் தாக்கப்பட்டதைக் கண்ட அங்கிருந்தவர்கள் பீதியில் உறைந்து போயினர்.

தாக்குதலுக்கு உள்ளான அந்த இளம்பெண் ஆசிய வம்சாவளியைச் சேர்ந்தவராக இருக்கலாம் என முதற்கட்ட தகவல்கள் தெரிவிக்கின்றன. தாக்குதலின் போது அவரது கழுத்து, நெஞ்சு மற்றும் வயிற்றுப் பகுதிகளில் பலத்த கத்திக் குத்து காயங்கள் ஏற்பட்டன. சம்பவ இடத்திலேயே அவர் உயிரிழந்தார். கொலையாளிக்கும் அந்தப் பெண்ணுக்கும் இடையே எவ்வித முன்விரோதமோ அல்லது தனிப்பட்ட உறவோ இருந்ததற்கான ஆதாரங்கள் இதுவரை கிடைக்கவில்லை என்பதால், இது திட்டமிடப்படாத ஒரு சீரற்ற கொலை (Random killing) என்று போலீசார் சந்தேகிக்கின்றனர்.

கொலை நடந்த போது அந்த பெண்ணைக் காப்பாற்ற முயன்ற 50 வயது மதிக்கத்தக்க நபர் ஒருவருக்கும் கையில் காயம் ஏற்பட்டது. இருப்பினும், அவரது உயிருக்கு ஆபத்து ஏதும் இல்லை என மருத்துவமனை வட்டாரங்கள் தெரிவித்தன. தாக்குதலைத் தொடர்ந்து தப்பியோடிய கொலையாளியைப் பிடிக்க போலீசார் தீவிர தேடுதல் வேட்டை நடத்தினர். இறுதியில், லெஸ் கோர்ட்ஸ் (Les Corts) பகுதியில் கருப்பு நிற பை மற்றும் ஹூடி அணிந்திருந்த 27 வயது மதிக்கத்தக்க சந்தேக நபர் ஒருவரை போலீசார் நேற்று மதியம் கைது செய்தனர்.

இந்தச் சம்பவம் தொடர்பான புகைப்படங்கள் மற்றும் கொலையாளி ஆயுதத்துடன் நிற்கும் காட்சிகள் தற்போது சமூக வலைதளங்களில் வெளியாகி பரபரப்பை ஏற்படுத்தியுள்ளன. பார்சிலோனா கால்பந்து மைதானத்திற்கு மிக அருகாமையில் உள்ள குடியிருப்பு பகுதியில், பட்டப்பகலில் நடந்த இந்த கொடூரக் கொலை அந்நாட்டு மக்களிடையே பாதுகாப்பற்ற உணர்வை ஏற்படுத்தியுள்ளது. கைது செய்யப்பட்டுள்ள நபரிடம் போலீசார் தீவிர விசாரணை நடத்தி வருவதோடு, பலியான பெண்ணின் விபரங்களை உறுதி செய்யும் பணியிலும் ஈடுபட்டுள்ளனர்.